د بلوچستان اعلی عدالت په دې صوبه کې د یوه نایابه مرغه څاړي پر ښکار بندیز لګولی، خو د سعودي د تبوک ایالت ګورنر هلته ښکار ته ورغلی، چې حکومتي چارواکو یې هرکلی کړی دی.
شهزاده فهد بن عبدالعزیز بن سلطان السعود د سعودي عربستان د شاهي کورنۍ غړی او د دې هېواد د تبوک ایالت ګورنر دی، چې هر کال په ژمي کې بلوچستان ته په ښکار پسې راځي.
شهزاده فهد پرون د اتوار په ورځ بیا د بلوچستان د چاغي ضلعې دالبندین سیمې ته په خپله شخصي الوتکه کې راغلی، چې د راتګ په وخت یې په سیمه کې کلک امنیت نیول شوی وو
د شهزاده فهد هرکلي ته په پاکستان کې د سعودي سفیر نواف احمد المالکي، د دفاع وزیر خرم دستګیر، د بلوچستان د ځنګلونو او ژویو ایالتي مشر عبیدالله بابت، یو قبایلي مشر حاجي علي محمد نوتېزی، د چاغي د ضلعي کونسل مشر داودخان نوتېزی، مرستیال کمیشنر شهک بلوڅ او نورو حکومتي چارواکي ورغلي دي.
د تبوک ګورنر فهد بن سلطان ته د پاکستان د بهرنیو چارو وزارت له خوا اجازه ورکړل شوې، چې د لسو ورځو لپاره بلوچستان ته راشي او په چاغي ضلع کې د نایابه مرغانو (څاړو) ښکار وکړي.
اوباره یا څاړی هغه مرغه دی چې اصل ځای یې د منځنۍ اېشیا د سایبېریا غرونه دي، خو په ژمي کې د پاکستان او افغانستان نسبتاً تودو سیمو ته پناه راوړي او د پسرلي له راتګ سره بیرته ستنېږي. د څاړي مرغه نسل په نړۍ کې مخ په ختمېدو دی، ځکه یې پر ښکار په نړیواله توګه بندیز دی.
په پاکستان کې هم د څاړو پر ښکار بندیز دی او د بلوچستان اعلی عدالت هم څلور کاله وړاندې د دې مرغه پر ښکار بندیز اعلان کړ، خو د پاکستان مرکزي حکومت او د بلوچستان ایالتي حکومت د عدالت د پرېکړې په خلاف هر کال د خلیجو هېوادونو عرب شیخانو او شهزادګانو ته ځانګړې اجازتپاڼې ورکوي، چې د څاړي ښکار وکړي
د بلوچستان د ځنګلونو او ژویو ایالتي وزارت وایي، حکومت دغو عربو شیخانو ته په لسو ورځو کې د ۱۰۰ څاړو د ښکار اجازه ورکړې، خو دوی هر یو په زرګونو څاړي ښکار کوي او له ځانه سره یې خپلو هېوادونو ته وړي
ښکاریان وایي د څاړي غوښه ډېره خوږه وي او ځینې خلک وایي غوښه یې شهوت زياتوي، ځکه عرب شيخان پخپله د دې مرغه په ښکار پسې پاکستان ته راځي. خوشال خان خټک هم- چې پر ښکار مين وو- پخپل يوه بيت کې څاړی یاد کړی دی:
مرتبې د دواړو نه دي سره سمې
څوک له ځايه باز شهن څوک څوړي څاړي
پاکستان ته نه یواځې د سعودي بلکې د نورو خلیجي هېوادونو شیخان، حکومتي چارواکي او شهزادګان هم د ښکار لپاره راځي او د بلوچستان د دوکۍ، ږوب او دالبندين سيمو په شمول د خیبرپښتونخوا په ډېره اسماعیل خان کې هم ښکار کوي.
د یادونې وړ ده چې د ۲۰۱۶م کال په دیسمبر کې د بلوچستان په پنجګور سیمه کې د دغو عرب شیخان پر کاروان وسلوال برید هم شوی وو، خو دوی ته پکې کوم زیان نه وو رسېدلی.
