د وزیراعظم عمران خان د وعدې سره جوخت، توقع دا ده چې قیدي هندي پایلټ ابهې نندن به نن آزاد کړای شي.
په هند کې رسنیو خبر ورکړی چې د هند د هوایي ځواکونو پایلټ، ابهی نندن چې د پاکستان په قید کې دی، ښایي نن د جمعې په ورځ به د واگه بندر له لارې هند ته واوړي.
رپوټونه زیاتوي چې پاکستاني چارواکي به ابهې نندن اول له راولپنډۍ نه لاهور ته بوزي او هلته به یې د جینیوا کنوینشن د ضابطو له مخې، د رېډ کراس یا سره صلیب نړېوال تنظیم ته وسپاري.
د هندي پنجاب وزیراعلی اماریندر سینگهـ هیله ښودلې چې په واگه کې به د ابهی نندن هرکلی وکړي.
د عمران خان دا تصمیم چې نن به د هند قیدي پایلټ آزادوي، له پراخ هرکلي سره مخ شوی دی.
دغه هندی پایلټ د شورو یا چهارشنبې په ورځ وروسته له هغه د پاکستاني ځواکونو لاس ته ورغی چې میگ ٢١ ډوله جنگي الوتکه یې وویشتل شوه او د کنټرول لاین پورې غاړې د پاکستان اختیار لاندې سیمه کې رانسکوره شوه.
د هند وزیراعظم، نریندرا مودي د هغه د فوري آزادیدو غوښتنه وکړه او د پاکستان وزیراعظم عمران خان بیا وویل چې د ښه نیت ښودلو په هدف به قیدي پایلټ د جمعې په ورځ خوشې کړي.
