پاکستانی پوځ وایي د امریکې د پلټنو رپورټ سره اتفاق نه کوي

د پاکستان پوځ ویلی چې په مومند ایجنسۍ کې د خپل دوؤ پوځي پوستو باندې د نېټو د هوائي بریدونو په بابله د امریکې او د نېټو د پلټنو رپورټ سره اتفاق نه لري کوم چې مېډیا خپور کړې دی.
د پاکستان پوځ د اطلاعاتو څانگې د زیارت په ورځ په یولنډ بیان کې ویلي چې د پلټنو رپورټ کې حقائق ندې بیان کړې شوي.
بیان کې دا هم ویل شوي دي چې د پلټنو رپورټ په مکمل او باضابطه توگه د ترلاسه کېدو وروسته به ځواب ورکولې شي.
تېره ورځ د امریکا د دفاع وزارت ویلی ؤ چې د پاکستان په قبایلي سېمه مومند ایجنسۍ کې هاغه هوایي بريد چې په نتيجه کې يې 24 پاکستاني عسکر وژل شوي وؤ د دواړو خواؤ لخوا د نېمگړو معلوماتو له امله شوې وه.
رپورټ کې دا هم ویل شوي وؤ چې تحقیاتو نه معلومه شوې چې امریکایي ځواکونو په خپل دفاع کې ځوابي کاروائي کړې ځکه پاکستاني پوځيانو لمړى په سرحدي سيمه کې په امريکائي او افغان ځانگړو ځواکونو باندې ډزې کړې وې.
پدې رپورټ کې د پاکستان د پوځیانو په وژل کېدو د افسوس څرگندونه شوې ده او دواړو هېوادونو ترمېنځ د رابطو نېشتوالی د دې پېښې علت گرځولې دی.