د پاکستان وزيراعظم شاهد خاقان عباسي په مشرۍ کې د قامي سلامتيا کونسل غونډې د امريکا صدر ډانلډ ټرمپ وینا ته په ځواب کې ویلي پاکستان نه د قربانۍ ګډوری جوړول به د افغانستان په امنیت کې مرسته وه نه کړي.
په اسلام اباد کې شوې د قامي سلامتيا کونسل په غونډه کې د پوځي مشرانو پشمول د کابینې ځنو وزيرانو هم ګډون کړی او د غونډې وروستو جاري شوې اعلامیه کې ويل شوي د افغانستان جګړه په پاکستان کې نشي کیدالی.
بيان زیاتوي په افغانستان کې د اوږدې مودې راهسې روانې جګړې د دغه هیواد بنيادي اډانه تباه کړې او پاکستان د افغان حکومت د مشرۍ او واک لاندې د امن عمل ملاتړ کوي. په بيان کې د امريکا صدر ډانلډ ټرمپ هغه تورونه هم رد شوي چي پاکستان د ترهګرو ډلو مرستي کوي، او که پاکستان دغه پاليسي بدله نه کړه نو په پاکستان د امداد بندولو باندي هم غور کيدې شي.
حکومتي اعلامیه په پاکستان کې د حقاني ډلی او د طالبانو د شورا د شتون په اړه څه نه وايي. امریکايي او افغان پوځي مشران دعوه کوي چې حقاني شبکه او طالبان له پاکستانه په امریکايي او افغان ځواکونو د حملو پلانونه جوړوي.
د غونډې وروستو د پاکستان سینټ ته په وینا کې د خارجه چارو وزیر خواجه اصف په سیمه کې د صدر ټرمپ لخوا هند ته زیات رول په ورکولو باندې ویلي چې هند جنوبي ایشیا ته امنیت نه شي ورکولی، او دلیل يې دا وو چې هند د ګاونډیانو سره تاو تریخوالی لري.
بيان وايي د ترهګرۍ پرضد روانه جګړه کې پاکستان ته ١٢٠ اربه ډالرو نه سوا تاوان رسيدلی او پاکستان ته د امداد پرځاې دې د دوي ورکړی شوي قربانيانې اومنل شي.
بيان د پاکستان حکومت او پوځ هغه دریځ هم تکرار کړی چې دوي بغير د څه تفريقه د ټولو ترهګرو ډلو پرضد کاروايي کوي، او پاکستان چا ته هم دا اجازه نه ورکوي چې خپله خاوره د بل هېواد پرضد استعمال کړي.
د نړيوالو اړیکو ماهر ډاکټر اعجاز خټک وي او ای ډیوه ته وايي پاکستان له امریکا ته په ځواب ورکولو کې د فکر نه کار اخستل پکار دي، ځکه د امریکا لخوا په پاکستان د امداد بندولو مطلب د اروپايي هیوادونو او نړیوال بنک لخوا هم امداد بندیدل دي.
ډاکټر اعجاز خټک زیاتوي: ٫٫ پاکستان ته به دا هم کتل وي چي ایا يواځې د چين سرمايه کاري به د پاکستان اقتصاد لپاره پوره وي. پاکستان ته پکار ده د ترهګرو پرضد د کاروایانو خبره يواځې تر بیانه نه وي او د نړۍ د قانع کولو لپاره عملي نمونې هم وړاندې کړي٬٬.
ښاغلی خټک وړاندې وايي پاکستان دې د افغانستان په حقله خپله تګلاره بدله کړي ځکه د طالبانو د پاللو د لارې پاکستان په افغانستان کې خپل مفادات نه شي ساتلی او دوي باید د جنګ ځپلي افغانستان سره اقتصادي او تجارتي لارې خلاصي کړي او د اولسونو ترميځ د ښو اړيکو لپاره دې اسانتیاوې پیدا کړي.
د امريکا صدر ډانلډ ټرمپ د افغانستان او سېمې په اړه د نوې پاليسۍ د اعلان په وخت ويلي وو پاکستان د امريکا نه په اربونو ډالرو امداد هم اخلي او د ترهګرو مرستې هم کوي او خبردارې يې ورکړی وو امریکا به نوره د پاکستان په دغه دوه مخيزه پاليسۍ غلی نه پاتې کيږي.
