د پاکستان پوځ ويلي، خېبرپښتونخوا کې یې په پينځه مختلفو ځايونو او پېښو کې یې د تحریک طالبان پاکستان 13 وسله والو وژلي دي، د پاکستان پوځ ټي ټي پي د خوارج په نوم يادوي.
پوځ ويلي، په 12مه او 13مه فرورۍ یې عمليات کړي دي.
ویل شوي، د ډېره اسماعيل خان په کولاچي سيمه کې ورته د وسله والو د موجودګۍ خبر ترلاسه شوی، هلته یې عمليات کړي، د شاه ګل عرف روحاني په ګډون یې هلته پينځه وسله وال وژلي دي.
پوځ ويلي، شمالي وزيرستان کې یې دوه ځايه عمليات کړي، په دوسلي او تپي سيمو کې یې د وسله والو سره نښتې شوي، پينځه وسله وال هلته وژل شوي دي.
ويل شوي، بله مقابله په لکي مروت کې شوې، يو وسله وال وژل شوی او د خېبر ضلعې په باغ علاقه کې هم د يو وسله وال د وژلو دعوه شوې ده.
پوځ د وسله والو څخه د وسلې ترلاسه کېدو ترڅنګ ويلي، وژل شوي وسله وال په امنيتي ځواکونو ترهګرو بریدونو او بې ګناه خلکو په وژنه کې ککړ وو.
خو پوځ د دغو وسله والو نوره پېژندګلو يا په دغې اړه نور تفصيلات نه دي وړاندې کړي.
د پاکستان پوځ چې کومو سيمو کې عمليات کوي هلته جرنلسټان يا مطبوعات رسايي نه لري، ځکه د ازادو سرچينو څخه د عملياتو په اړه تاييد نه کيږي.
د پاکستان حکومتي مشرانو د پوځ تازه عمليات ستايلي دي.
د سرکاري خبري ادارې [اې پي پي] ترمخه، وزيراعظم شهباز شريف ويلي، د ملک څخه د ترهګرۍ په بشپړ ډول ختمېدو پورې به د ترهګرۍ ضد جګړه روانه وي.
د نوموړي په خبره، د ترهګرۍ ضد جګړه کې قام د پوځ سره څنګ په څنګ ولاړ دی، د دښمن ارادې به ناکامه کولی شي.
د پاکستان پوځ په دې وروستيو کې د خېبرپښتونخوا په جنوبي او قبايلي ضلعو کې عمليات چټک کړي دي.
دا په داسې وخت کې چې غېر دولتي ادارې پاکستان انسټيټيوټ اف کنفلکټ اېنډ سيکيورټي سټډيز، پيکس د رپورټ ترمخه، پاکستان کې د جنورۍ په مياشت کې وسله وال بريدونه 42 فيصده سېوا شوي، په 74 بريدونو کې د 52 امنیتي ساتونکو او 20 ملکي وګړو په ګډون 120 کسان وژل شوي وو.
پيکس ويلي، د تېر په څېر تېره میاشت هم تر ټولو زيات وسله وال بريدونه او د تښتونو زياتې پېښې په خېبرپښتونخوا صوبه کې شوي دي.
Forum