دجاپان او امريکا ترمينځ دپوځ دمنتقلۍ تړون

دامريکا او جاپان ترمينځ ديو تړون لاندې به په اوکيناوا جزيره کې گمارلي 9,000 امريکائي ميرينز دپيسفک سيمې نورو مقاماتو ته منتقليږي.
ددغه تړون اعلان دزيارت په ورځ واشنگټن او ټوکيو په يو گډ بيان کې کړى دى، دغه ميرينز به هوائي، دامريکا گوام سيمې او اسټريليا ته منتقليږي، خو په اعلان کې ددې خبرې وضاحت نۀ دى شوى چې ميرينز به کله ځي.
گوام ته دميرينز منتقلۍ کې به ټوکيو ته داندازتاً 8.6 بلينو ډالرو دقيمت څخه 3.1 ادا کول پکار وي.
دجاپان حکومت امريکا سره دهاغه تړون هرکلى کوي چې ترمخه به يې امريکائي ميرينز داوکيناوا څخه نورو مقاماتو ته منتقليږي.
ټوکيو کې خبريالانو سره دخبرو په مهال دجاپان خارجه وزير گيمبا دغه تړون يوه گټوره لاس ته راوړنه گرځولې ده.
هغه وويل چې گوام او دايشياء پيسفک نورو مقامونو ته دنهو زرو ميرينز دمنتقلۍ عمل اوکيناوا کې دامريکا دپوځي موجوديت دبوج کمولو په لوري دسختو گامونو استازيتوب کوي.
ددغه تړون مقصد ددواړو هيوادونو هيوادونو ترمينځ په اوکيناوا کې داوږدې مودې څخه دميرينز په موجوديت تاؤتريخوالى کمول دي.
دغه نظرثاني شوى تړون دجاپاني وزيراعظم يوشي هيکو نوډا دامريکا دسفر څخه وړاندې مخې ته راغلى خو جاپان او امريکا تر دې مهاله په اوکيناوا کې قائمې د لانجمنې فوټينما پوځي اډې په بنديدو متفق شوي نۀ دي.
جاپان په 2006م کې داوکيناوا په اړه دترسره شوي تړون دشرطونو پوره کولو کې ناکام پاتې شوى.
ددغه تړون لاندې دپوټينما ائيربيس لپاره متبادل ځايې لټول ؤ خو کوم ځائيونه چې دمتبادل په توگه وټاکل شول هغه په سيمه ييز کچ ددغه منتقلۍ سخت مخالفت شوى ؤ.
په نوي جاري شوي بيان کې دواړو هيوادونو وئيلي دي چې دفوټينما اډه دې د2006م دتړون لاندې دناها شمال کې موقعيت لرونکي کيمپ شواب ته منتقل کړى شي
ددواړو حکومتونو وينا ده چې دا تر دې مهاله مخې ته راغلى تر ټولو ستر دعمل جوگه هوارى دى.
داوکيناوا اوسيدونکي وائي دښار سره نزدې د فوټينما پوځي اډه دشوره ډک او خطرناکه ده بايد دا دجزيرې څخه منتقل کړى شي.
ددغه پوځي اډې دمنتقلۍ معامله دجاپان او امريکې په هاغه عسکري ائتلاف کې دفاصلو پيدا کولو وجه هم جوړيده چې له امله يې دواړه هيوادونه په ايشياء کې دطاقت دتولې دبرقراره ساتلو دپاره زيات مهم گڼل کيږي.
دامريکا ددفاع وزير ليون پنيټا وائي امريکا به اوس جاپان سره په گډه په دغه تړون دعمل کولو دپاره کار کوي.
هغه وويل جاپان دامريکا يواځې يو اتحادي نۀ بلکې يو نزدې دوست هم دى او هغه ددغه دوستۍ او برخې لرنې دلا پياوړتيا هيله لري.
په ډاگه دې وي چې جاپان کې دامريکا خواؤشا 50,000 پوځيان تعينات دي.